Eth Patronat de Torisme dera Deputacion de Lhèida ei ua entitat de promocion toristica creada er an 1989 entara gestion dera aufèrta toristica deth conjunt des comarques lheidatanes. Era sua foncion a consistit dempús dera sua creacion ena promocion des atractius e productes toristics de tota era demarcacion de Lhèida, dempús d’ua optica integrau, mejançant era utilizacion des airines de comunicacion e marqueting entà plaçar era mèrca “Ara Lleida” enes diferenti mercats.
Er an 2014 se complissen es 25 ans dera constitucion deth Patronat, er acte constitutiu que auec lòc eth 18 de junhsèga de 1989 en estanh Gento (Palhars Jussà), damb representants de toti es conselhs comarcaus e des principaus associacions e entitats des sectors economics e toristics lheidatans.
Es comarques de Lhèida lideren era aufèrta de torisme actiu e d’espòrts d’aventura en l’Estat tot, damb mès de 200 enterpreses toristiques, 11 centres d’iuèrn e ua superfícia esquiabla de 460 km de pistes.
Pendent aguesti 25 ans de foncionament, eth Patronat a plaçat es tèrres de Lhèida, dera plana ara montanha e jos era mèrca “Ara Lleida”, coma ua destinacion toristica privilegiada e amabla, a on eth visitant pòt gaudir d’ua grana aufèrta culturau, d’ua grana varietat d’espòrts e d’activitats de torisme actiu e era celebracion de diferenti campionats deth mon (caiac, parapent, ala delta, piragüisme, eca.), damb ua aufèrta de natura unica, ua rica e variada aufèrta gastronomica autoctòna e de qualitat e un torisme rurau atau coma ua aufèrta de lotjament de nauta qualitat.