Iniciatiua pionèra e prevencion de proximitat
Era Deputacion de Lhèida e era Fundació Renal Jaume Arnó, amassa damb eth Departament de Salut dera Generalitat de Catalonha e era Unitat de Diagnostic e Tractament de Malauties Aterotrombotiques (UDETMA), meteren en foncionament en gèr de 2015 er ‘Autobús dera Salut’. Se tracte d’un estudi scientific pionèr en Catalonha que permeterà realizar en tres ans pròves a 12.000 lheidatans damb risc de patir ua malautia cardiovascular o renal.
Aguesta unitat medicau sus arròdes comencèc era sua rota en Artesa de Lhèida (Segrià) damb er objectiu de recórrer es comarques de Lhèida entà conéisher er estat de salut des artèries e era prevalença dera malautia renal amagada dera poblacion damb factors de risc. Es pròves se realizen en un autobús medicalizat que se desplace in situ enes municipis entà realizar un diagnostic precòç a ua poblacion d’entre 40 e 70 ans, seleccionada ar azard entà amassar diferenti factors de risc.
Pendent eth transcors d’aguest estudi s’an incorporat d’autes pròves d’especialitats restacades damb era salut vasculara, coma Pneumologia, Neurologia e Endocrinologia.
En 2017, er ‘Autobús dera Salut’ contunhe eth sòn recorregut per tot eth territòri.
Resultats
Se detecten afectacions en un 65% de pacients
Era equipa deth ‘Autobús dera Salut’ ja a pogut obtier es prumèrs resultats dempús d’analizar es pròves des 4.849 persones que passèren per autobús medicalizat de gèr de 2015 a noveme de 2016. D’aguestes, un 65,4% an descorbit bèth tipe de malautia ateromatosa (diminucion deth calibre des artèries pr’amor dera acumulacion de plaques de grèish).
Maugrat açò, solament 62 persones an estat derivades a un especialista espitalari per malautia arteriau severa, çò que signifique qu’ena majoria des casi aguestes pròves an estat preventives. En concrèt, s’an derivat 53 persones entath Servici de Neurologia der Espitau Universitari Arnau de Vilanova de Lhèida e 9 persones entath Servici de Cirurgia Vasculara deth HUAV.
Cribatge de càncer de còlon e rècte
Dempús der an 2013 e enquiath 2016, era Deputacion de Lhèida collabòre en Programa de Diagnostic Precòç deth Càncer de Còlon e Rècte deth Departament de Salut entà que mès de 88.000 persones de 50 a 69 ans poguen hèr-se’n pròves preventives. Era Deputacion i a aportat 1,9 M€.