Aprobacion dera Generalitat a tres projèctes FEDER dera Deputacion de Lhèida

FEDER_WEB

Eth pressupòst aprovat entre es tres projèctes ei de 8.154.357,28 €, çò que represente ua captacion de hons FEDER de 4.077.178,64 €

Eth Departament de Presidéncia dera Generalitat de Catalonha aprovèc, damb data 7 de junh, tres projèctes FEDER presentadi pera Deputacion de Lhèida (Camins tradicionaus des Pirenèus, Camin de Sant Jaume: hilat peth auviatge, e Païsatges de Ponent) damb un pressupòst de 8.154.357,28 €, un hèt que represente ua captacion de hons FEDER de 4.077.178,64 €.

Concrètaments, eth projècte ‘Camins tradicionaus des Pirenèus’ consistís en profitar eth hilat de camins tradicionaus de forma que vertèbre eth senderisme enes comarques pirenenques, mejançant era connexion des nuclèus de poblacion, era dinamizacion dera sua economia e era religadura de toti es territòris, atau coma era realizacion d’òbres de restauracion, adeqüacion e mesa en valor d’infrastructures restacades damb eth hilat. Beneficie es comarques deth Naut Pirenèu, der Aran, deth Solsonés e part dera Noguera. Er impòrt elegible deth projècte ei de 1.750.250,99 € e eth cofinançament de FEDER serà de 875.125,49 €.

Per çò que tanh ath projècte ‘Camin de Sant Jaume: hilat peth auviatge’, consistís en méter en valor tota era riquesa patrimoniau qu’aufrís eth camin de Sant Jaume ath sòn pas per Catalonha e, concrètaments, en tram comprenut entre Tàrrega e Alfarràs. Se preven 20 intervencions en auviatge de 17 municipis e accions de promocion e gestion deth trajècte. Er impòrt elegible deth projècte ei de 2.465.485,91 € e eth cofinançament de FEDER serà de 1.232.742,95 €.

Fin finau, eth projècte ‘Païsatges de Ponent’ consistís en méter en valor er auviatge naturau e culturau de cinc encastres d’accion: eth Canau d’Urgelh, era Noguera Baisha, es Païsatges dera Aigua (nòrd deth Segrià), es Païsatges der Òli (es Garrigues) e eth Segrià Shut. En totau, se preven 90 accions en 55 municipis damb un impòrt elegible deth projècte de 3.968.620,33 € e eth cofinançament de FEDER de 1.984.310,16 €.

Entà çò qu’ei deth periòde 2015-2019, ara demarcacion provinciau de Lhèida s’an aprovat 95 operacions de FEDER per un volum de despensa elegible d’uns 45,5 M€, çò que a implicat era captacion de 22,7 M€ de hons FEDER. D’aguestes, 7 operacions son de gestion dirècta dera Deputacion de Lhèida e representen ua inversion elegible de 15,3 M€ atau coma era mobilizacion de 7,6 M€ de hons FEDER.

Eth rèste d’operacions (88) son d’autes administracions (ajuntaments, conselhs comarcaus) o entitats (universitat, centres tecnologics, associacions sense ànim de lucre), e arreceben assisténcia tecnica per part deth Patronat de Promocion Economica e supòrt economic per part dera Deputacion de Lhèida per un totau d’uns 7 M€.

Lhèida, 12 de junh de 2019