Tributs locaus

Era adaptacion dera Administracion publica as naues tecnologies ei un besonh basic entà modernizar e facilitar es gestions des ciutadans. Eth desplegament deth plan e-Administracion e era metuda en foncionament deth burèu virtuau der Organisme Autonòm de Gestion e Recaptacion de Tributs (OAGRTL) a supausat un important increment des gestions administratives des ciutadans e es administracions locaus damb era Deputacion de Lhèida, a mès d’un important estauviament economic e era consecutiva simplificacion administrativa.

Er an 2013 se realizèren ath torn de 16.000 tramits en linha, chifra que represente un 75% d’increment en usatge deth burèu virtuau respècte der an anterior.

Era informatizacion des diferenti servicis administratius, atau coma era gestion des sistèmes informatics e de comunicacions dera institucion, an supausat ua inversion de 80.000 èuros, mès es resultats dera interaccion en hilat s’an tradusit en un important estauviament (reduccion de cargues administratives) d’uns 500.000 èuros dempús dera implantacion deth servici.

Parallèlament, era Deputacion de Lhèida a adoptat diuèrses mesures encaminades ara gestion deth “dia a dia” d’ajuntaments e familhes. Er OAGRTL a auançat enquia mejan 2014 un volum de mès de 37 MEUR en concèpte d’auançament ordinari as ajuntaments, independentament qu’agen o non agen requectat es impòsti d’IAE, Urbana e Rustica.

Es auançaments extraordinaris as municipis s’an incrementat considerablament. Se er an 2008 sigueren 12 es ajuntaments peticionaris, en 2013 s’arribèc ena seishantau, damb un volum aproximat de 8 MEUR.

En çò que tanh es ciutadans, tanben s’an incrementat eth nombre de fraccionaments e prorrògues. Se en 2009 era Deputacion de Lhèida atenguec 138 sollicituds de prorròga, en aguesti moments se placen ath torn des 1.200 peticions. A mès, era Deputacion destinèc en 2014 uns 350.000 èuros ara accion sociau de conselhs comarcaus e ajuntaments, qu’an beneficiat ues 4.000 familhes de tot eth territòri de Lhèida.