Eth compromís sociau ei ua valor fòrça viua ena societat lheidatana. Er esfòrç de fòrça persones e entitats contribuís dirèctaments ara transformacion sociau, culturau e civica de municipis e comarques. Er associacionisme a estat en passat e ei en present un des compausants dera personalitat deth país e a contribuït ara configuracion d’ua societat activa, responsabla e solidària.
Era Deputacion de Lhèida, conscienta que totes aguestes entitats e associacions –sostengudes per persones volontàries que provien des camps mès diuèrsi– hèn part dera realitat que mos entornege, amie a tèrme ua importanta accion de govèrn adreçat a multiples sectors de poblacion damb besonhs e demandes especifiques e diuèrses.
Era Deputacion de Lhèida destine ua part importanta des sòns recorsi a accion culturau e sociau en tot eth territòri.
Es comarques de Lhèida compden damb ua neurida representacion d’entitats pròpries, circonscrites en uns airaus, collectius e accions territoriaus determinadi. Actuaument, ues 1.200 associacions e entitats de tot er encastre territoriau de Ponent e eth Pirenèu desvolòpen multiples projèctes e toti aguesti arreceben supòrt institucionau dera Deputacion, pr’amor que era accion d’aguestes entitats sense ànim de lucre e conformades per volontariat ei de gran supòrt entàs municipis e era sua activitat se complète damb era accion pròpria des institucions.
Era darrèra grana obtencion en encastre sociau a estat era creacion dera Taula Assessora deth Tresau Sector e Salut, de collaboracion e coordinacion des diuèrses politiques sociaus entre era Deputacion de Lhèida, era Generalitat de Catalonha e es entitats sociaus e sanitàries qu’actuen enes tèrres de Lhèida.
Era Aufèrta Culturau der IEI ei un bon exemple dera vitalitat culturau e de léser d’aguestes tèrres, mès eth territòri amasse, a mès, nombroses organizacions e collectius que trabalhen en encastre deth desvolopament sociau e amien a tèrme iniciatiues de caire associatiu, ludic e sociau de natura fòrça diuèrsa.
Testimònis
Associació Cultural de Raiers de la Noguera Pallaresa. President, Miquel Gordó:
“Comprenem qu’era prioritat actuau ei era atencion sociau, mès encara qu’agen baishat es subvencions, sòrt n’auem. En cèrta manèra, son ua inversion.”
Associació Cultural Vall de Lord. President, Jaume Adam:
“Era Deputacion mos cedic eth materiau resultant d’ua exposicion que hérem ar IEI er an 2009 e aguesta donacion mos permetec hèr realitat eth sòmni de daurir ath public era colleccion e auer un musèu dera Val de Lord en costat des claustres deth monastèri de Sant Laurenç de Morunys. ”
Federació de Colles de l’Aplec del Caragol. Xavier Pérez, president:
“Ei era nòsta obligacion entà retornar eth supòrt arrecebut ara Paeria, ara Deputacion e ara Generalitat. ”
Festival de Músiques de les Muntanyes d’Europa. Director artistic, Arnau Obiols:
“Non ei facil qu’en temps de crisi s’apòste per un eveniment culturau que nèish nau. Pensi que s’a comprenut que Trama ei ua inversion qu’a supausat un revulsiu important entara comarca.”
Orfeó Lleidatà. Director Generau, Xavier Quinquillà:
“Eth supòrt institucionau ei fonamentau entà garantir un accès democratic ara cultura. ”
Patronat de la Passió de Cervera. President, Xavier Cañabate:
“Era manèra qu’era gent de Cervera viuem era Passion ei un sentiment collectiu que s’a de víuer e s’a de veir. Demoram a poder seguir damb eth damb supòrt des subvencions dera Deputacion. ”
Teatre de Butxaca. Director, Jaume Jovells:
“En territòri i a fòrça pòbles que non pòden dar ua aufèrta culturau ath long der an pr’amor qu’es ajuntaments an pòqui recorsi. D’ací neisheren es projèctes Cua d’Estiu e Mènsula, que sense eth supòrt dera Deputacion jamès non s’aurien pogut programar. ”
Transsegre Balaguer. Collaborador ena organizacion, Carles Gatnau:
“Podem díder qu’es institucions se chaupen entà mostrar eth nòste territòri. ”
Trobada d’Acordionistes del Pirineu. Fondador e director, Artur Blasco:
“Era prumèra Amassada siguec eth 1976, mès era origina se remonte a 1965. Ara vien musicians de tot eth mon. Compdam damb ajudes de fòrça institucions, includida era Deputacion.”