Es deputacions provinciaus son organs de caractèr supramunicipau d’eleccion indirècta. Era sua composicion ei regulada pera Lei organica 5/1985, de 19 de junh, de regim electorau generau. En foncion deth nombre d’abitants, pertòque en cada província un nombre concrèt de representants. Arreceben eth nòm de deputats provinciaus e s’escuelhen entre bailes e còssos. En cas dera província de Lhèida, eth maximal son 25 mentre eth nombre de residents non supère es 500.000.
Ath madeish temps, aguesti deputats son adscrits a un partit judiciau, ei a díder, son representants des divisions deth territòri d’acòrd damb era organizacion pròpria dera administracion de justícia. En cas dera província de Lhèida, eth nombre de partits judiciaus ei de 7.
Eth President
Eth maximal representant dera Deputacion ei eth sòn president e ei escuelhut entre es deputats e es deputades que formen eth Plen. Dempús deth 1979, an presidit era Deputacion de Lhèida Jaume Culleré (1979 UCD), Ramon Vilalta (1983 PSC); Ramon Companys (1987 CiU); Josep Grau (1990 CiU), Josep Pont (1999 CiU); Isidre Gavín (2003 CiU); Jaume Gilabert (2007 ERC); Joan Reñé (2011 CiU) e Rosa Maria Perelló (2018 CiU).
Era institucion tanben a cinc vice-presidents e un pòrtavotz entà cada grop politic damb representacion ena institucion. Actuaument, eth nombre de deputats ei de 25 (12 CiU, 4 PSC, 6 ERC, 1 PP, 1 CUP, 1 Ciutadans).
Organs de govèrn
Es organs de govèrn dera Deputacion de Lhèida son:
Eth Plen: ei er organ collegial de govèrn e apròve es accions dera institucion. Se celèbre de manèra ordinària un còp en mes e se’n pòt convocar de manèra extraordinària. Es plens son publics.
Era Junta de Govèrn: ei constituïda peth president dera Deputacion e per un tèrç deth nombre de deputats. Ei facultada entà préner acòrds.
Era Junta de Pòrtavotzes: l’intègren eth president dera corporacion e tanben toti es pòrtavotzes.
Es comissions informatives: s’i someten a informacion toti es acòrds que son ratificadi o aprovadi posteriorament peth Plen. Cada comission a un deputat responsable.