FEDER

FEDER_WEB

Projèctes europèus en biomassa e dinamizacion toristica

6,9 M€ entà 124 municipis de Lhèida

Generar energia a trauès dera gestion dera biomassa enes comarques deth Pirenèu e era dinamizacion toristica des comarques de Ponent a compdar dera mesa en valor der auviatge naturau e culturau. Aguesti son es dus projèctes que beneficiaràn 124 municipis lheidatans gràcies as mès de 3,4 M€ qu’era Deputacion de Lhèida a artenhut deth Hons Europèu de Desvolopament Regionau (FEDER). Aguesti 3,4 M€ representen eth cinquanta per cent d’un totau de 6,9 M€ que s’invertiràn en territòri damb aguestes dues iniciatives impulsades pera Deputacion de Lhèida.

Es dus projèctes apartien as Èishi 4 e 6 dera convocacion 2014-2020, que son es linhes destinades a projèctes locaus entà potenciar eth desvolopament des territòris en tematica de miei naturau e auviatge culturau, damb vinculacion toristica, e eth desvolopament dera eficiéncia energetica.

Eth projècte Forest4Locau, damb ua inversion de 3,7 M€, articularà un sistèma d’economia circulara que s’iniciarà damb era gestion forestau des bòsqui de proprietat municipau en Pirenèu de Lhèida e era transformacion dera biomassa forestau en estèra entà aplicar-la enes installacions termiques e es caudères des equipaments publics deth territòri.

Era iniciativa beneficiarà 66 municipis des comarques deth Naut Urgelh, dera Nauta Ribagòrça, dera Cerdanha, deth Palhars Sobirà, eth Palhars Jussà e era Val d’Aran. Er aute projècte, nomentat Ponent Actiu, supause ua inversion de 3,2 M€ entà assolidar un modèl de torisme sostenible e competitiu a compdar dera mesa en valor der auviatge naturau e culturau.

Aguesta iniciativa se centre en espacis coma er Aiguabarreig deth Segre Cinca, er Estanh d’Ivars e Vila-sana, eth Mas de Melons d’Alfés, es secans deth Segrià e d’Utxesa, era Sèrra e es Tossals de Torregrossa, la Sèrra d’Almenara a Bellmunt, era arquitectura populara coma era pèira shuta e elements de gestion dera aigua en arriu Set, en arriu Corb o en Segre.

Era corporacion mantenguec reünions de trabalh damb es conselhs comarcaus entà avalorar es projèctes qu’èren susceptibles de sollicitar era linha d’ajudes dera naua convocacion e atau presentar es melhores iniciatives. Es accions beneficiàries arreceben un finançament d’enquiath 50% deth còst totau dera inversion. Er aute 50% se distribuís en un 25% qu’assumís eth madeish consistòri e un aute 25% qu’apòrte era Deputacion de Lhèida.

Trobaratz mès informacion ací

Nòta de premsa 15 seteme 2017

Nòta de premsa 13 junh 2017

Nòta de premsa 4 mai 2017