Sepulcres Comdes d’Urgelh

Sepulcre

310518 monestir les avellanes

310518 monestir les avellanes 10 - Còpia

Es sepulcres des comdes d’Urgelh fomentaràn er interès toristic e culturau dera comarca.

Era Deputacion de Lhèida a metut en marcha un ambiciós projècte de reproduccion des ancians sepulcres des comdes d’Urgelh deth monastèri de Santa Maria de Bellpuig des Avellanes damb er objectiu de recuperar –damb era ajuda de naui materiaus, tecniques e tecnologies– era memòria historicopatrimoniau dera comarca e de hèr visibles toti aqueri elements arquitectonics, artistics e culturaus que contribuïren ara fixacion, delimitacion e coesion der ancian Principat de Catalonha.

Ath darrèr deth passat magnificent e dera esplendor artistica d’establiments religiosi e civius coma eth de Bellpuig des Avellanes, fondat pes Comdes d’Urgelh en dotzau sègle, eth castèth Formós de Balaguer, era collegiala de Sant Pere d’Àger o es grani monastèris cistercencs de Santes Creus, Vallbona de les Monges e Poblet, s’amague ua realitat d’espoliacion des bens arquitectonics e artistics d’aguesti centres. A fin deth sègle XVII e pendent es guèrres napoleonenques, se panèc fòrça auviatge culturau, deth temps qu’era desamortizacion eclesiastica deth sègle XIX representarie entà Catalonha un còp irreparable ath sòn auviatge religiós e ua devaluacion dera realitat istorica deth país.

Per tot açò, era Deputacion de Lhèida e eth monastèri des Avellanes amien entà deuant es trabalhs de reproduccion des sepulcres reiaus qu’actuaument s’exposen a The Cloisters, eth musèu depenent deth Metropolitan Museum of Art de Naua Yòrk. Era fasa de digitalizacion damb lasèr ei alestida e, per tant, eth procès de generacion d’imatges de nauta resolucion permeterà, a partir d’ara e un còp elegit eth supòrt materiau, era reproduccion en 3D des sepulcres de pèira deth sègle XIV.

A banda dera volontat de recuperacion patrimoniau, aguest projècte nèish damb era idèa, tanben, d’èster un exemple de tot eth contrari deth que a succedit damb eth conflicte der art de Sixena. Eth camin e era formula ei arribar a consensi a compdar de solucions tecniques qu’aué dia son absoludament possibles gràcies as auanci tecnologics, que favorissen era preservacion der auviatge aquiu a on ei conservat e permeten, ath madeish temps, ua reproduccion fidèla d’aguest auviatge istoric as sòns lòcs d’origina.

Collaboracion damb eth Metropolitan Museum of Art

Era Deputacion de Lhèida s’amassèc pendent eth mes de junhsèga damb es responsables e es tecnics deth Metropolitan Museum of Art, encargadi dera digitalizacion des quate sepulcres des Comdes d’Urgelh originaris deth Monastèri de Santa Maria de Bellpuig e qu’actuaument se tròben enes Estats Units, concrètament a The Cloisters. Es imatges sobri es quaus s’a trabalhat es modèls de fotogrametria 3D corresponen a quate cavòts: Ermengol VII, doble cavòt d’Àlvar I d’Urgelh e Cecilia de Fois, eth sepulcre d’Ermengol X e eth cavòt d’un mainatge, probablament d’Ermengol IX.

En mes de junhsèga, era Deputacion, eth director deth Monastèri de Santa Maria de les Avellanes, Robert Porta, e era conservadora deth The Metropolitan Museum-The Cloisters de Naua Yòrk, Lucretia Kargère, presentèren eth projècte collaboratiu de digitalizacion des sepulcres reiaus enes IX Jornades d’Istòria de Bellpuig de les Avellanes.